Executive日記——不滿「寵物小精靈」改名 比卡超粉絲誓保港譯名

        香港地,日日有示威遊行,Kelly都慣咗嘞,但昨天竟然有人為卡通角色抱打不平,發動遊行,吸引小妹眼球look多一look。事緣「寵物小精靈」喺香港hit咗差不多二十年,Kelly都係小粉絲,最鍾意可愛到爆嘅「比卡超」,但日本任天堂想推出新一代遊戲,仲話要統一卡通角色嘅中文譯名,把「比卡超」改名為「皮卡丘」,搞到好多粉絲唔like,佢哋昨天組織遊行反對,成為新聞。

        小妹知身邊有啲朋友昨天參加咗個叫「十萬伏特」嘅大遊行,要求日本任天堂不要為「寵物小精靈」改新名,例如「寵物小精靈」唔好改做「精靈寶可夢」,「比卡超」唔好改叫「皮卡丘」,因為大家對原名好有親切感咁話。

  爭取保留原名嘅二十多名粉絲,昨天高舉「保衞香港譯名,不要皮卡丘,還我比卡超」橫額,去到日本領事館,要求任天堂聆聽香港粉絲嘅心聲,場面真係別開生面。不過亦有網民話,好似阿媽幫個仔改名咁,其他人好難反對喎。

  任天堂同小妹講,雖然遊戲將會顯示為「皮卡丘」字樣,但不會將讀音強制為「皮卡丘(PeiKaaJau)」,仍會以「Pikachu」來發音,分別其實唔係大咁話喎!

Kelly Chu

hd