Executive日記——猛人雲集 彭羚等唱《光與生命》 民生90歲盛宴 財爺搞笑祝賀

        民生書院昨晚舉行九十周年晚宴,十年樹木百年樹人,民生培養出唔少猛人,喺社會上身兼要職。晚宴筵開百席,衣香鬢影,當中更加首播籌備已久,由校友陳秋霞,林志美及彭羚合唱的慶祝民生九十載主題曲《光與生命》,共享喜悅的一晚。

        Kelly知道晚宴喺九龍灣國際展貿中心舉行,筵開百席,約有一千多位校友嘉賓出席,食衞局局長高永文做主禮嘉賓,佢致詞時大讚民生書院︰「作育英才九十年,培養數以十萬計的學生」,而身在北京嘅財爺曾俊華拍片祝賀,讚民生人才輩出,話細個好羨慕民生仔女讀男女校好開心,仲「怨」屋企人送佢讀男校喎,好搞笑!

  晚宴重頭戲係由跨越三代校友同心協力所創作,為慶祝民生九十載的主題曲《光與生命》MV的首播,由陳秋霞,林志美及彭羚合唱,張崇德及張崇基等合唱,而MV拍攝更有達七至八十位校友參與。專業製作人袁劍偉指導,中電發展總裁莊偉茵統籌項目的宣傳及製作,務求為民生準備一首結合校友汗水而製的主題曲,當中王維基更免費借出合共七百萬的拍攝器材。

  晚宴星光熠熠,名人雲集,Kelly見到港大法律學院首席講師張達明及第一代金融分析師林森池等等,唔少猛人都同小妹講佢哋都好懷念昔日學生時代嘅風光。

Kelly Chu

hd