Executive日記——介紹中英潮語 褚簡寧拍嘉倩BB講英文

        資深傳媒人褚簡寧(Michael Chigani)喺《頭條日報》寫嘅專欄《又中又英》,拆解英語謬誤,見解精闢,係高收視率嘅專欄,Kelly追讀學好英文。小妹聽聞Michael嘅新電視節目好快啟播啦,今次佢夥拍萬人迷女主播陳嘉倩,以新聞人物嘅英文為題材,談新聞,學英文。Michael透露,同嘉倩BB合作無間,新節目會講解英語嘅slang(俚語),兼論中文潮語,聽見都覺得有趣呀!

        Michael同嘉倩BB主持嘅新節目,叫做《睇新聞講英文》,九月十九日周一喺無線互動新聞台首播,之後逢星期一、三、五同六出街,每集大約一分半鐘,大家唔使擔心錯過呀,因為每集同日會重播兩至三次,確保大部份觀眾都睇到。

  小妹問過Michael,佢話新節目會選用新聞人物嘅soundbite(錄音名句)為題材,講解吓英語嘅slang(俚語),仲會講解吓中文潮語點樣正確翻譯為英文,佢話為咗搵題材,國際同本地新聞都唔放過,務求令節目緊貼時事又富有趣味。

  港人英文水平差距大,題材太難會令人卻步,太易觀眾又未必獲益,睇嚟要搵好題材一啲都唔易,Michael認同新節目好有挑戰性,不過無有怕,事關同嘉倩BB合作好順暢,兩個都會負責搜羅好題材同觀眾分享,唔會怕無貨交呀。

Kelly Chu

hd