Executive日記——白色情人節單身放閃 男神傳授「特別攝影技巧」

        昨天三月十四日,係白色情人節,唔少人同另一半去街街,影相「放閃」,不過單身朋友唔會落寞,事關有「政界男神」之稱嘅青年事務委員會主席劉鳴煒,就喺網上示範「特別嘅攝影技巧」,教大家如何單身晒幸福,Kelly睇到覺得好Work,即刻Share畀單身朋友仔。

        話說小妹上社交平台,見到鳴煒上載幾張相,好似有位女士伸手餵壽司畀佢食,個畫面好有Feel,另外兩張相就係調返轉,由鳴煒送上熱茶同甜品畀鏡頭前嘅人享用,只係見不到個女仔樣,同樣好Sweet。

  正當小妹想八卦下女士嘅身份,發現原來成件事係鳴煒同大家開玩笑,佢自爆原來佢係自己餵自己食壽司,仲特登喺右手搽上紅色嘅指甲油,至於另外兩張相,原來係佢用水壺同杯做「腳架」頂住手機自拍而成,非常鬼馬,搞到大家以為有位女士同佢一齊撐枱腳。

  原來鳴煒咁做有原因,佢喺網上話,每逢情人節都有大量情侶喺facebook「放閃」,佢專誠同網民分享特別嘅攝影技巧,「令你即使係單身都可以晒幸福」,仲話祝大家白色情人節快樂,勉勵大家就算單身都唔使氣餒咁話,真係搞笑!

Kelly Chu

hd