Executive日記——2016傑出領袖 今晚登場

  星島新聞集團主辦嘅年度盛事「傑出領袖選舉」,今年係第二十三屆啦,今晚假君悅酒店舉行,事前由重量級人馬組成嘅評審委員會精挑細選四名傑出領袖得獎者,將政商界名人及影視紅人雲集,一起見證呢個重要時刻。Kelly仲八卦到,「長毛」梁國雄嘅「剋星」係得獎者之一,仲有一位商界女強人,小妹賣個關子先,讀者記住留意今晚結果揭盅啦!

  香港地人才濟濟,唔少業界精英成就超卓,得到國際性嘅認同。星島新聞集團自一九九四年起已舉辦呢項選舉,為表揚喺唔同領域上對推動香港發展有重大貢獻嘅領袖人物,一向都係城中年度矚目盛事。今屆肩負挑選得獎者重任嘅評審委員會,位位係社會賢達,包括擔任委員會主席嘅周松崗爵士,以及七名委員包括陳永棋、陳南祿、蔡元雲醫生、梁君彥、李國章教授、李國棟醫生及徐立之教授。

  Kelly收到風,今晚出席晚宴嘅嘉賓卡士好強勁,政商界猛人雲集,除咗有特首梁振英、財政司司長陳茂波和律政司司長袁國強等高官外,仲有星島新聞集團獨立非執行董事何超瓊、機管局主席蘇澤光、科大校長陳繁昌、中華廠商聯合會會長李秀恒,好多城中名流名媛、演藝界紅人都會出席,好似劉嘉玲、鄺美雲同堪輿學家李丞責等,屆時肯定星光熠熠,閃爆全場,有咁多不同界別猛人雲集,真係罕見。

  Kelly仲八卦到分別來自工商/金融、社區/公共事務/環境保育、教育 /專業/科技及創新、以及體育/文化/演藝四個組別嘅傑出領袖,好猛料,包括最近特首選戰期間好talk得嘅長毛「剋星」,仲有去年先後成為全球五十大及中國二十五大最具影響力女性嘅商界女強人,以及去年刷新跳繩世界紀錄嘅港產世界冠軍等,由於今晚先頒獎,所以現在不能披露,都係等大會公佈。

  大家想知道頒獎盛況,請密切留意隨《星島》、《頭條》、《The Standard》明天嘅報道;《星島日報》明天隨報附送「2016年傑出領袖選舉」特刊,有各得獎者嘅感言及分享成功之道,以各評審委員嘅評語;下周一至四於《星島》內「每日雜誌」仲有得獎者嘅專訪,唔好錯過呀!

Kelly Chu




hd