Executive日記——林鄭公然向鬍鬚曾挖角 肥仔聰:搵到個好老闆唔容易

  前晚嘅特首選舉論壇火花四濺,全城一地花生殼,最多人講嘅其中一幕,係林鄭竟然讚薯片叔叔嘅前政治助理羅永聰(阿聰)「做得非常好」,仲話想請阿聰加入自己團隊O添!薯片昨日就趁勢上載咗一段阿聰「拍住上」嘅短片,阿聰話「搵到個好老闆唔容易」,仲信心爆棚話薯片會當選,選舉之後「梗係繼續幫佢啦」!

  官場同傳媒中人多數叫阿聰做肥仔聰,佢喺皇仁書院畢業,攞咗港大法律學位和新聞碩士,先後喺《信報》同《明報》做過記者同埋《明報》採訪主任,又拎過獎學金去牛津大學做訪問學人。一二年獲曾俊華邀請做佢政治助理,舊年十二月薯片叔辭任財爺,阿聰就喺同一日辭職,以義工身份加入佢競選團隊。Kelly八到,阿聰呢幾年好似「軍師」咁幫薯片叔出謀獻策,並寫Blog同出fb post,成功呃like ﹗

  阿聰咁年輕有為,難怪林鄭對佢讚不絕口,仲公開挖角啦!不過,阿聰就透過短片透露無意轉工,話「搵到個好老闆唔容易,好好彩呢幾年我遇到一個」,大讚薯片叔係好老闆,仲爆薯片叔睇網民留言睇到喊O添!至於特首選舉過後佢會做啲咩,佢就話:「佢(曾俊華)當選嘛,我梗係繼續幫佢啦!」

  其實薯片叔嘅前任政治助理葉根銓,同樣都係傳媒人出身,一樣係轉數快、夠靈活嘅「橋王」,亦都係肥仔一名,Kelly覺得薯片叔真喺好識用人啊!

Kelly Chu




hd