Executive日記——探完熊貓飲番杯 海洋公園夜場品靚酒Chill爽!

        Kelly鍾意趁周末同朋友落吧Chill Out飲兩杯,今日起港島區有新蒲點啦!海洋公園全新夜場活動「Chill Out @ The South」今晚開幕,活動為期一個月,每逢周末舉行,可品嚐約二百款紅酒、白酒、日本清酒和手工啤等,係本地少有嘅夜間優閒活動,抵讚!

        去海洋公園除咗可以玩機動遊戲同探吓熊貓、睇企鵝之外,今日起至四月十七日期間連續五個星期,每逢周五至周日以及指定日子,晚上五時至十時或十一時,仲可以去埋「Chill Out @ The South」,品嚐美酒佳餚、欣賞迷你演唱會等。

  場內設有逾二十個美食攤位,其間會轉換三個不同美食主題,今日起一連兩個周末打頭陣嘅係「清酒嚐味祭」,以六十蚊優惠價即可試到一支價值二千五百多元嘅日本國寶級清酒「十四代本丸」,其他仲會有「Chill爽啤酒音樂夜」及「星級美酒佳餚薈」,門票由一百六十八蚊至七百八十八元不等。海洋公園副主席劉鳴煒(見圖)話,今次活動投資超過一千萬元,希望鞏固香港美食之都嘅地位,暫時難以估計期間可吸引多少入場人次,未來會考慮舉辦更多主題夜場活動喎。

Kelly Chu

hd