Executive日記——傳媒大姐大哥要做臨記 特首辯論觀眾席坐唔滿

        本周二由七大電子傳媒合辦嘅特首選舉辯論,三名候選人唇槍舌劍,擦出火花,Kelly睇直播,勁剝花生,電視熒幕上見到有幾名傳媒高層坐喺觀眾席上, 原來當晚獲邀請入場嘅觀眾,甩底率接近一半,睇嚟市民對現場剝花生嘅興趣不大,搞到班傳媒大姐大哥要做臨記。

        特首辯論嘅二百名現場觀眾,係由中大及嶺大兩間大學隨機以電話詢間並邀請入場,不過Kelly八卦到,當晚七大傳媒嘅大姐大佬都坐喺後座觀眾席,包括now新聞及財經資訊首席副總裁張志剛。

  現場觀眾可以睇到三名候選人互相質詢,更有機會向未來特首提問,機會難逢,但Kelly聽聞,今次兩間大學好難先搵到呢批現場觀眾,有負責抽樣邀請市民嘅人員打足一晚電話,都請唔到足夠數目嘅觀眾,平均一個抽樣員只係搵到零點八至零點九個觀眾,聽講大學本來係收錢做抽樣,但出現咁嘅狀況,搞到蝕晒本啦,證明市民對現場剝花生嘅興趣唔係咁高,結果有勞傳媒大姐大哥做臨記充撐吓場面。

Kelly Chu

hd