Executive日記——指黎智英屈人 小心變「屈原」投江 何柱國揭肖建華「第一桶金」秘聞

  內地富豪肖建華一月喺四季酒店失蹤一事,星島新聞集團主席何柱國喺昨晚嘅「傑出領袖選舉」頒獎禮上披露事件內情,除講述肖建華離開酒店過程,仲披露肖建華如何取得「第一桶金」,佢仲揭開肖建華如何生下五十幾個親生子女嘅秘密!佢又指黎智英成日屈人,小心會變「屈原」投江。

  何柱國每年喺「傑出領袖選舉」頒獎禮晚宴上致辭,對時事人物的評論,都句句到肉,成為全場亮點。佢昨晚話,第一次同肖建華見面,得知佢係隱形富豪,向佢請教如何搵到第一桶金。靠電腦發跡嘅肖建華話,喺九十年代識到一班外國電腦公司代表,佢同呢班外國商人講,想喺中國事業成功,必須要同解放軍做生意,然後話佢識得解放軍,可以幫班外國人搭路。

  肖建華之後搵咗部軍車接班外國人去解放軍軍事科學院,大廳門口有解放軍列隊,大廳有一張大圓枱,有解放軍嘅上將、中將同少將坐喺一邊,言談間班外國人覺得好興奮,想同佢哋做生意,嗰位「上將」就話搵肖建華溝通啦。肖建華就開出條件,要班外國人將部份利潤分畀佢,結果一、兩年間佢賺到二千萬元美金,但肖建華後來自爆,原來廳入面嘅軍人,都係佢嘅親戚,阿爸係上將,阿媽係少將等,全部穿上租返嚟嘅制服假扮,而嗰個科學院係唯一開放予外界接待外賓嘅地方,係佢租回來嘅。

肖炫耀生五十幾個仔女

  何柱國仲話,肖建華有五十幾個親生仔女,就係搵嚟一班名校畢業、高材生甚至係博士嘅女仔,每晚都會視乎每個女仔嘅排卵期去同佢哋過夜,因為佢想令下一代保持最好嘅基因喎。

  佢仲話,四季酒店保安嚴密,以佢所知,肖建華當日深夜同一位好朋友傾完偈後,係自願離開嘅。

  另外,何柱國又提到特首選舉,指候選人胡國興被《蘋果日報》創辦人黎智英「屈」做「中共臥底」;旗下《壹周刊》報道又指候選人林鄭月娥與馬會官商勾結,何柱國指黎智英「成日屈人,小心變屈原,要投江自盡。」

  佢話黎智英形容「佔中」發起人戴耀廷好純真,「呢條友(戴耀廷)五六十歲人仲叫純真?男拔生出名係蠱惑仔,叫佢純真係侮辱男拔。」

Kelly Chu

hd