Executive日記——前主播特首戰論壇做主持 李家文教書又拍紀錄片

        昨晚又係特首選舉論壇,鬍鬚曾、林鄭同胡國興成為焦點,Kelly就望多兩眼女主持人李家文嘞,因為好耐無見呢位無線前主播啦﹗Kelly八卦到,原來佢而家主力喺樹仁大學新聞與傳播學系教書,又會拍吓紀錄片同做吓節目主持,生活多姿多采啊﹗

        李家文喺一○年離開無線新聞部,之後好少公開露面!佢今次接受選委會邀請,與港台城市論壇前主持謝志鋒一齊主持呢次選舉論壇,Kelly問佢點解肯呢,原來佢喺為咗一班學生!家文話,論壇由建制派同民主派選委一齊搞,可以畀佢了解兩派意見,同埋知多啲選舉情況,幫到佢教學工作咁話,真係一位好老師!

  佢又話,同謝志峰喺DBC數碼電台合作過,合作無間咁話。而兩位主持喺論壇之前都做好準備,好似昨日論壇未開始之前,兩人喺候選人代表在場果陣,抽出觀眾之前寄嚟嘅問題,之後佢哋要審核吓呢啲問題係咪相關,同埋會唔會有偏頗、冒犯等嘅問題,真喺好嚴謹!

  除咗教書,家文喺唔同媒體做節目主持,好似有線財經資訊台嘅《Sunday有理講》 同埋港台電視嘅「時代的記錄─鏗鏘集」。佢仲嘗試拍紀錄片,之前拍咗《撼動》,o依家又拍緊一套探討傳媒行業角色嘅紀錄片。

Kelly Chu

hd