Executive日記——周達明護妻 否認「鬧到喊」傳聞 AO金童玉女恩愛 馬會常客

        特首選舉,傳言滿天飛,近日有報道就指財經事務及庫務局常任秘書長謝曼怡曾被上司林鄭月娥「鬧到喊」,謝曼怡嘅丈夫、公務員事務局常任秘書長周達明昨天就為愛妻澄清,否認有關傳聞。周達明同謝曼怡係政務官(AO)當中嘅金童玉女,都係叻仔叻女兼做到嘢,做佢哋老細,又點會鬧呢?

        周達明出席立法會一個委員會後遇到記者,被問到太太謝曼怡是否曾被林鄭「鬧到喊」,佢否認其事,並指「有關指佢同我太太會喺政府換屆時離職,係與事實不符。」周達明強調,公務員係一支專業嘅隊伍,無論幾時都會盡忠職守,仲話:「唔會因為政府換屆或者有新特首而有所改變嘅。」

  政務官老友對Kelly講,周、謝兩人出晒名係AO金童玉女,靚仔靚女,兩人好恩愛㗎,平日政務繁忙,但閒時會出入馬會活動吓,仲帶埋個仔仔,由於得到爸媽嘅優良基因,仔仔係靚仔一名,身型高大威猛,仲高過爸爸小小O添。

  講開AO金童玉女,就不得不提前AO、現任機管局企業發展執行總監嘅馮永業,以及佢太太、民政事務局常任秘書長馮程淑儀,都係靚仔靚女,而馮太喺籌建故宮博物館一役,拍住林鄭向公眾解畫,據傳受到林鄭器重喎。

Kelly Chu

hd