Executive日記——迪士尼新酒店 高檔美食奉客

        迪士尼樂園第三間酒店——「探索家度假酒店」將於今個月正式開幕啦,聽樂園老友講,三間新餐廳會同時登場,Kelly最為食,當然打聽吓有乜美食供應啦,其中中式菜館雲龍軒專攻精緻中菜,一個招牌炒飯盛惠二百八十八蚊,走高檔路線,食家要留意啦。

        迪士尼老友話畀Kelly知,雲龍軒用雲同龍做主題,餐廳中間吊起一隻大飛龍風箏,有如飛龍在天。餐廳副廚師長李偉雄,入廚二十幾年,九年前入職迪士尼餐廳任副廚師長,佢喺六年前嘅香港美食之最比賽中以一款「金湯椰王海中寶」奪得湯羹組金獎,來頭唔細㗎!喺佢主理下,雲龍軒嘅炒飯,選用蟹肉同龍蝦做饀料,加入全蛋白,仲以少少鹹蛋黃起油鑊,每粒飯都炒到香濃惹味,炒飯會連埋一個金色嘅鑊一同上桌,聽落好吸引。

  另外兩間餐廳,分別係芊彩餐廳同星航咖啡廳,前者提供國際美食,後者有歐陸式早餐同全天候用餐,任你選擇。Kelly仲發現呢間新酒店推出全新紀念品,全部以探險為主題,好似迪士尼探索家筆記本、原子筆、鎖匙扣、手機殼等!

Kelly Chu

hd