Executive日記——英文簽名可以睇到性格 心理學家讚林鄭大方坦白可靠

  林鄭月娥當選下屆特首,之前佢落區果陣,有市民問佢拎簽名留念,Kelly都好想睇吓未來特首嘅字跡,有選委就披露咗林太近日一封感謝信件,入面有佢親筆英文簽名﹗小妹請教過心理學家,原來由林太嘅簽名可以睇得出,佢喺一個可靠、坦白同堅持嘅人﹗

  呢封林太寫俾選委嘅信,入面係佢多謝選委提供好多寶貴嘅意見,又話會繼續以「關懷」、「聆聽」、「行動」與大家同行。林太又話,佢會創造一個更加好嘅環境,唔會辜負選委同市民對佢嘅期望。

  封信入面有林太嘅親筆英文簽名,而一個人嘅筆跡可以反映出性格㗎。小妹請教過心理輔導學家蔡綺文,佢話從林太嘅筆觸,可以作多分面分析,喺落筆力度嚟講,林太用力適中,代表佢係一個自信同有堅持嘅人,而林太寫字大細適中,代表佢識中庸之道。另外,佢成個簽名維持水平,唔會忽高忽低,反映佢獨立同有主見。

  蔡綺文留意到林太寫「i」字時唔會遺漏咗頂部一點,而且係以近乎橫線去寫一點,顯示林太喺一個着重細節嘅人,而佢寫「l」寫得瘦長,睇得出林太比較善於思考,批判能力較高,但社交能力有待改善咁話。蔡綺文又話,林太成個簽名好清晰,令人睇得出佢寫咩字,反映佢亦係一個大方、坦白、可靠嘅人。

Kelly Chu




hd