Executive日記——遺傳音樂細胞 馬雲唱京劇

  阿里巴巴創辦人馬雲不嬲都畀人「周身刀、張張利」嘅感覺,Kelly近日發現原來佢識得唱京劇啵!

  馬雲一直都好鍾意唱歌,舊年佢喺一個音樂節唱陳奕迅嘅《好久不見》同埋Beyond嘅《海闊天空》,除咗流行曲之外,Kelly搵到一段片,發現馬雲原來仲會唱京劇。片中嘅馬雲睇落好高興,唱咗京劇《紅燈記》選段《渾身是膽雄赳赳》。有網民大讚馬雲字正腔圓、鏗鏘有力,Kelly覺得馬雲唱傳統嘅京劇都可以唱得有板有眼、琅琅上口,真係多才多藝啦!唔講唔知,其實馬雲嘅爸爸馬來法,係一個曲藝家,喺中國曲藝界堪稱元老級人物架,睇嚟馬雲遺傳咗佢嘅音樂細胞!

Kelly Chu


hd