Executive日記——小股東建議請食自助餐 時亨哥回應四両撥千斤

  港鐵昨日開股東大會,Kelly聽一個小股東講,大會上面有不少小股東提出好有趣嘅建議,包括有人提議港鐵取消乘客生日優惠,改為請食自助餐,港鐵主席馬時亨變身成為「太極高手」,四両撥千斤,輕鬆應對咗股東大量嘅訴求啊﹗

  喺股東會上面,有小股東話港鐵應該取消依家嘅每月生日優惠,將啲資源用來搞自助餐回饋小股東,馬時亨未拆招,已經有另一個股東幫手,反對咁做,指港鐵有咁多小股東,食幾日都未食得完,馬時亨難得有人解圍,輕描淡寫咁話︰「多謝你意見」。

  又有一個股東話,覺得應該可以俾長者免費搭港鐵,連兩蚊都唔好收。呢個股東都算「獅子開細口」,馬時亨就笑住話會同政府反映吓喎,又過咗場。

  股東會入面,唔少人提出一啲好個人化嘅意見,例如係投訴港鐵服務,同埋港鐵旗下嘅屋苑維修問題,馬時亨一開始已經話「我先小人後君子」,講明一啲個人化個案唔適合喺大會度討論,就算係有人想讚港鐵員工,都一樣俾馬時亨截住,全部交工作人員跟進。

  另外,港鐵仲同小股東玩遊戲,為咗俾班小股東熟習第一次用嘅電子投票系統,出咗一條模擬題,問大家有無每日做運動,結果有九成九答日日做運動,大家都好注重身體啊!

Kelly Chu

hd