Executive日記——港學生動畫揚威 迪士尼嘉許

        香港學生好叻好有創意,最近就有中學生喺美國迪士尼動畫節拎咗兩個獎﹗呢位來自天水圍翁祐中學嘅中六學生王耀南,第一次參加動畫節,憑住自己原創動畫拎咗最佳故事大獎同3D動畫組別亞軍,揚威海外!另外,香港迪士尼傳來好消息,各位學生哥可以用全新嘅夏日通行證無限次暢遊香港迪士尼啊!

        今年美國嘅華特迪士尼國際青少年動畫節比賽十分盛大,總共有超過一百四十套動畫作品參賽。嚟自以動畫同科創發展馳名嘅順德聯誼總會翁祐中學嘅中六學生王耀南,就成功以3D電腦動畫《Different》打入決賽,最後仲拎咗最佳故事特別大獎同埋3D動畫國際組別亞軍。佢喺有份創作《腦筋急轉灣》、《海底奇兵》嘅動畫師Robb Denovan手上接過獎項,好威威啊﹗

  王耀南呢套動畫用咗擬人法,講一個「燈泡人」追求自己條人生路嘅故事。佢話希望透過呢套動畫,鼓勵年輕人唔好俾社會風氣同期望局限,佢覺得唔一定人人都要做醫生、律師,反而應該根據自己嘅能力同意向去選擇適合自己嘅道路。

  王同學話,今次比賽令佢可以同多國際著名動畫大師見面,啲大師畀咗好多有用嘅意見佢,令佢得到好多啟發,佢仲話之後想入讀薩凡納藝術設計大學,修讀動畫及視覺特效專業啊﹗

專享無限次夏日通行證

  另外,香港迪士尼推出全新優惠,只要你係三至二十五歲嘅學生哥,就可以用七百五十九蚊,買到一張夏日通行證,咁就可以由今日開始,直到八月四號,無限次暢遊香港迪士尼啦﹗

Kelly Chu

hd