Executive日記——嫌貴嫌慢唔好幫襯! 「好難食」列明五不招待

         香港地寸金尺土,食肆想盡辦法吸引食客光顧,Kelly最近發現大埔有間餐廳,反而以「好難食」招徠,仲喺舖頭前面列咗五大規條,講明嫌貴嫌慢嘅就唔好去食,非常有自信喎!

        呢間「好難食牛肉麵」原名九米香,喺舖頭放咗個大牌,列明「五不招待」,包括不招待嫌貴、嫌慢、嫌少、趕時間同囉囉嗦嗦嘅客人,非常搞笑。Kelly八卦到,食過嘅人唔單止話唔難食,仲話「好難喺香港食到咁正嘅牛肉麵」!只係老闆有性格,對食物有要求,想用心做好每一碗麵咁啫。

  老闆話畀小妹知,每日都用成五、六個鐘煲湯底,碗碗牛肉麵都即叫即做,好有心機㗎,所以寧願嗰啲嫌三嫌四嘅人唔好嚟食,留番畀識得欣賞佢食物嘅人咁話喎!仲話生意一直好穩定,呢排仲喺西九龍中心開埋分店,所以話,客人唔係一定大晒,最緊要識得互相尊重!

  問到餐廳有乜名食?佢就話,除咗招牌「好難食」牛肉麵之外,八號風球炒蟹、碼頭咕哩炒花蛤同慾火焚身魚蛋都好正,仲話包保辣到你慾火焚身!哈哈,真係名都改得有趣過人,搞到Kelly都心思思想去試下啊!

Kelly Chu


hd