Executive日記——提防「關公」出現 精叻公關分38獎

  公關係一個重要嘅行業,若喺發放消息過程稍一不小心,就會變成「關公災難」㗎啦!上周五晚喺「第三屆香港公共關係獎二○一六」嘅頒獎典禮暨晚宴,主禮嘅候任特首林鄭月娥都話,佢自己經過選舉洗禮後,發現公關嘅重要性,仲大讚佢哋係物有所值啊!

  香港公共關係專業人員協會喺第三年頒發香港公共關係獎,今年頒獎典禮仲請到林鄭月娥做主禮嘉賓。林太喺致辭時話,自己喺一五年嗰陣曾經笑指,有啲公關嘅人工太高。不過,經過特首選舉之後,林太話佢更加意識到公關對一個人成功嘅重要性,亦都更識得欣賞專業嘅公關人士,大讚佢哋嘅工作係物有所值。台下嘅公關聽到之後,大拍手掌!

  林太發言之後,大會就頒發咗七個類別共三十八個獎項,嘉許公關公司同埋從業員嘅專業成就。例如最高榮譽大獎由奧美公共關係有限公司奪得,奧美嘅盧欣余亦係新晉公關專業人員獎其中一位得主,而縱橫公共關係顧問集團嘅曾立基就得到卓越公關專業人員大獎。

Kelly Chu

hd