Executive日記——睇埋方太圍裙 回憶返晒嚟 屋企飯展覽好溫馨

  香港人工作忙碌,成日OT,有時都未必有機會返屋企食餐飯。時代廣場就舉辦咗個叫「笑聲笑聲,滿載溫馨」嘅展覽,用一啲八十年代嘅飯廳微型模型,同埋幾十年前嘅食譜等展品,去講一個「一餐屋企飯」嘅故事。Kelly覺得個展覽好有「家的味道」,好溫馨啊!

  時代廣場會喺今日至八月六號舉辦「笑聲笑聲,滿載溫馨」展覽,帶大家進入一次關於味覺嘅回憶之旅。喺展覽入面,會有幾組微型香港八十年代飯廳同廚房嘅模型,仲分咗做基層公屋戶、 中產戶、富戶,展現各個階層家庭嘅家居環境同餸菜。大家可以喺模型中見到,富戶屋企裝修豪華啲,有獨立飯廳,餸菜中仲有冬瓜盅!而中產戶嘅飯廳就喺客廳旁邊,基層公屋戶更加係開張摺枱、幾張摺櫈做飯廳,而且菜式都會簡單一啲。呢啲展品夠晒寫實啊!

  展品中又有迷你廚具、五十年前嘅飲食收據、大廚陳榮師傅喺半世紀前寫嘅食譜等,仲搵到著名烹飪節目主持方太(方任利莎),帶嚟四十件佢曾經喺烹飪節目中着過嘅圍裙、廿一份方太食譜手稿、八十本烹飪書籍等。個展覽咁有趣,Kelly都要同屋企人一齊去睇吓,重溫吓喺屋企食飯嘅幸福味道先得!

Kelly Chu




hd