Executive日記——中環海濱展大型公共傢俬 齊探索「HK」字樣大迷宮

  O依家唔少空間都講「共建」、「共享」,希望可以俾更多市民參與設計同興建過程。嚟緊八月尾就有一個「大型公共傢俬展暨遊樂會」,到時會邀請二千名市民一齊砌出一個佔地五千平方米嘅大型卡板迷宮,個迷宮仲會砌成「HK」字樣,慶祝香港回歸二十周年!

  活動會由八月二十五至二十七號喺中環海濱活動空間舉行,喺二十五號當日,二千名市民會一齊用八千塊木卡板,砌出一個「HK」字樣嘅迷宮,個迷宮會有五千平方米咁巨型,Kelly覺得好壯觀啊!

  迷宮入面仲會放置二十件大型公共傢俬,其中一件係由幾個建築系學生同兩位長者一齊設計,呢個裝置就好似個百寶箱咁,入面會有幾款經典遊戲,例如有一個放大咗同垂直掛起嚟嘅棋盤,等長者可以一邊下棋,一邊做簡單嘅伸展運動。

  主辦機構話,希望市民到時可以喺迷宮同公共傢俬入面玩樂、探索,一齊共享「共建」成果。另外,佢哋仲會搞抬轎比賽、手工藝工作坊等活動,到時一定好精采啦!

Kelly Chu


hd