Executive日記——獲老師體諒准過夜 少年財爺闖學校通宵溫書

  財爺陳茂波出身基層,佢昨天喺網誌話,上周文憑試放榜之前,返咗中學母校培聖中學為師弟妹打氣,仲分享佢當年無地方溫書,晚上偷偷地返學校讀書,好在得到老師體諒,仲可以留過夜,佢自嘲話,好似丙組隊努力踢,爆冷取得好戰績咁。

  自小住板間房嘅波哥,就讀當年仲喺九龍塘牛津道嘅培聖中學,佢憶述當年屋企細,圖書館又多人去難搵位,所以約埋幾個同學,夜晚偷偷地返學校溫書,有時溫習得太夜仲索性喺學校瞓,擅闖學校係犯校規㗎,好彩波哥與同學仔操行向來良好,老師體恤,於是隻眼開、隻眼閉,咁關懷學生,真抵讚。波哥不負學校所望,考入中文大學,同屆學生仲有二十人一齊入讀中大,也有不少人到外地升學,成績令人鼓舞。

「爆冷」考到好成績

  波哥好搞笑咁話,頗有點「丙組隊」努力作賽,最後「爆冷」踢出好成績嘅味道。波哥同師弟師妹講,每個挑戰只係人生旅途中其中一個章節,無論文憑試成績點都好,唔可以代表日後嘅發展同成就。佢希望同學唔好輕言放棄,只要努力堅持,一定可以譜出人生最燦爛嘅新篇章。

Kelly Chu




hd