Executive日記——10‧11公佈 堪輿師:有貴人相助 吉日出《施政報告》旺林鄭

  新人事新作風,新任特首林鄭月娥預告佢第一份《施政報告》嘅公佈日子,會由梁振英時代嘅二月份,調番去以往嘅十月,最新消息係佢會喺十月十一日發表《施政報告》。Kelly八卦,望吓通勝,新曆十月十一日係農曆八月廿二係吉日,宜祭祀、冠笄、移徙、會親友、納財、理髮、捕捉。小妹請教過師父朋友,佢話林太當日會有「月德貴人」同「天德貴人」相助,工作會順利喎!

  堪輿學家黃震宇就同Kelly講,農曆八月對林太嚟講係好月,會有粒「月德貴人」照住佢,而廿二日(即新曆十月十一日佢公佈首份《施政報告》當天)仲會多咗粒「天德貴人」,即係雙重貴人幫助,工作應會順利之餘,更有助名望增長,預料林太講嘅嘢會特別有力咁話;加上林太八字本身有「食神」,除咗代表有衣食,當日更會有「食神制剎」,代表佢有能力令人接受佢所講嘅嘢。

  另一位師父區仲德都話,林太係「火照金神局」,屬暗木,本身大旺,好有朋友緣,但係壓力就會大啲;不過好在當日會有「智慧貴人星」畀佢借助強力改善民生,佢仲有信心林太可以解決民怨咁話!信唔信,大家等多兩個多月,自有分曉。

Kelly Chu


hd