Executive日記——北韓考慮導彈攻擊 關島原來好多港人

  想去關島嘅港人要留意喇!北韓軍方警告,話會「慎重研究」向喺太平洋嘅美國屬土關島發動導彈攻擊!Kelly聽到個心都離一離,唔好以為美韓打交唔關香港事,關島上有二千幾個華人,而香港人都有幾百個,而且每月會有約一千個港人去關島旅遊,大家要留意事態發展啊!

  小妹問過關島觀光局,佢哋話關島人口有十七萬三千人,其中華人佔二千七百人左右,當中台灣人最多,港人排名第二,約有七百人,內地人就最少。另外,每個月有八百至一千個港人到訪關島,大部份係旅遊度假,多數係自由行。

  二戰結束後,關島一直係美國屬土。關島有好多迷人嘅海灘,喺上世紀六十年代開始發展旅遊業,慢慢就吸引台灣、香港人去當地旅行或者定居,近六、七年仲多咗內地人去。華人係關島無特定聚居地點,主要經營同旅遊業有關嘅生意,好似係潛水公司、酒店、餐廳等。

Kelly Chu

hd