Executive日記——李純恩讚美態 一夜消失可惜 九寨溝湖水別具特「色」

        四川九寨溝發生七級大地震,專家估算威力相當於三十七枚原子彈咁強,當地著名的天然彩湖變成濁水,Kelly覺得好傷感啊﹗九寨溝啲湖水因含「鈣華」而呈現不同顏色,且清澈而美,連旅遊達人李純恩都大讚九寨溝嘅「水」具有獨特美態!

        九寨溝嘅湖水出名清澈,連水底都望得一清二楚,同埋湖水有唔同顏色,係因為水底有一種碳酸鈣沉積物,叫「鈣華」,加埋各類水藻,喺陽光折射之下,就會呈現碧綠、寶藍、橙黃等唔同顏色,如果再加上秋天時兩岸嘅紅葉、黃葉嘅倒影,就令湖水色彩更繽紛啦!

  旅遊達人李純恩話,佢去過九寨溝三次,分別係夏、秋、冬天,三個季節啲景色都好唔同,例如秋天係彩色嘅,而冬天就會變成白色。佢話自己鍾意冬天去九寨溝多啲,除咗因為遊客少好多之外,仲因為當地嘅瀑布會結冰,係一大特色!依家九寨溝因為地震而美景不再,佢都覺得好可惜!

  Kelly身邊有朋友話見到災情嚴重,都好想捐款支援,小妹發現香港紅十字會有個「中國賑災金」項目,係用嚟支援佢哋喺內地賑災同備災工作,當中包括今次嘅四川地震。捐款形式有支票同銀行入數,中銀、滙豐、東亞等銀行都可以。

Kelly Chu

hd