Executive日記——頭條Jetso送「開季試閘樂滿FUN」門券

  每逢暑假,Kelly好多朋友就忙於為仔女搵節目,咁小妹有好介紹,頭條Jetso App送今個月二十六號舉辦嘅沙田馬場「開季試閘樂滿FUN季前嘉年華」門券,可以同小朋友係馬季開鑼前參觀馬場。

  今次親子嘉年華以六個主題區域劃分,包括親親馬兒、充氣動感區、創意探索區、才藝激發區、活力挑戰區、幼兒發展區,啱晒一家大細一齊玩,當中喺彭福公園嘅「親親馬兒」活動區域,小朋友可以同小馬零距離全接觸,有得喺馬場騎馬仔之餘,仲有機會同來自英國嘅雪特蘭小馬一齊合照O添!

  節目另一重頭戲,係睇馬匹喺草地試閘,馬匹唞完暑一定龍精虎猛,正正可以畀大家親身感受一下眾馬奔騰嘅震撼性,仲有現役著名騎師放下馬鞭進行競跑大賽,到時候肯定又係一番龍爭虎鬥。除咗遊戲攤位外,馬會今年仲同「香港弦樂團」及「姚珏天才音樂學院」帶嚟全新驚喜音樂節目,小朋友仲有機會擔任小指揮,感受下交響樂嘅奧妙魔力。

  想感受一個既緊張刺激又好玩嘅周末,立即下載頭條Jetso App回答簡單問題就有機會獲得入場券四張,名額共六十五個,快啲開App玩啦!

Kelly Chu

hd