Executive日記——「機場大使計劃」 今年有海外交流團

  青年其實出路好多,香港青年協會就搞咗個「機場大使計劃」,新一屆機場大使喺昨日完成交接典禮,佢哋喺未來一年會為旅客服務,仲有機會參加計劃首次舉辦嘅海外交流團,認識其他地區嘅機場運作㗎!

  Kelly昨日去咗機場大使計劃嘅交接典禮,見到新一屆有三十四位青年擔任機場大使,上一屆嘅大使就順利畢業,當中有七個人仲獲晉升為機場領袖大使添!其中一位畢業嘅機場大使張幗玲話,呢一年嘅經驗,令佢處事更加成熟同自律,佢獲頒「最佳機場大使」獎項,同埋晉升為機場領袖大使,真係前途無限呀!

  機場大使受聘於機管局,會接受十二個月嘅在職培訓,為旅客服務,解答查詢。今年計劃新增海外交流機會,佢哋仲可以去日本、韓國、新加坡等地作交流,親身了解當地機場嘅運作,認識國際優質顧客服務,擴闊眼界!

Kelly Chu

hd