Executive日記——網民要求港姐改名「TVB小姐」 無線指深入民心不用改

        新一屆香港小姐新鮮出爐,冠軍雷莊𠒇成為話題,有網民認為佢唔代表香港喎,部份人發起聯署,要求將「香港小姐」個名改為「TVB小姐」。TVB發言人就回應,指「香港小姐」選舉有四十幾年歷史,名稱、標誌、音樂等早已喺香港同內地註冊。TVB中人補充,話「香港小姐」選舉深入民心,無需要改喎。

        部份網民唔like今屆冠軍,又話「香港小姐」選舉唔係TVB原創,有人發起聯署要改名做「TVB小姐」。小妹剝花生睇戲,記者朋友話問過TVB,發言人話「香港小姐」選舉喺香港及內地註冊咗,沿用四十幾年,人人熟知,冇改名嘅打算。有位TVB中人仲同小妹講,香港小姐競選深入民心,啲人一聽到嗰段經典音樂、見到個logo,都會自然諗起香港小姐,但香港有言論自由,人人可以品評,但就唔會改名。對於今次爭議,呢位TVB中人反而覺得,事件證明好多人睇香港小姐選舉,否則唔睇過,又點會有意見,又點會有話題,多謝大家支持咁話。

  講起「香港小姐」,首屆競選喺一九四六年六月舉行,當時TVB未成立,由香港中華業餘泳團及英國空軍俱樂部主辦,場地喺北角七姊妹區嘅高級娛樂場所「麗池花園夜總會」,當時民風保守,泳裝環節引起哄動,當時有十六人報名,最終得返十一個人出場,首位港姐名叫李蘭。

Kelly Chu

hd