Executive日記——1949年香港就有摩天輪

        中環海濱摩天輪經營權易手,掀起全城關注,好可能要清拆重建,Kelly好唔捨得個咁靚嘅摩天輪,不過一個摩天輪迷老友話,舊嘅不去,新嘅不來,仲話其實早喺一九四九年,北角便起咗全港第一個摩天輪,仲被形容為「突然沖天,可以考驗膽汁」!

        小妹問過一些研究香港典故嘅人士,佢哋相信香港第一個摩天輪,係喺北角嘅「月園」(Luna Park)。月園喺一九四九年十二月二十二號開幕,位於北角英皇道,係一個結合主題公園、戲院、夜總會嘅娛樂綜合體,佔地十八萬七千平方呎,係當時全港最大型嘅遊樂場,用咗幾百萬去興建,工程浩大!

  月園入面有幾款機動遊戲,包括過山車、「航空機」、「活龍車」,又有旋轉木馬同摩天輪,好先進㗎!而全港第一個摩天輪,當時宣傳形容為「兔起鶻落,突然沖天,有驚無險,可以考驗膽汁」!對當年嘅人嚟講,全部設施都係前所未有、新奇有趣!當時入場費要一蚊,而每項機動遊戲收費五毫或一蚊。「月園」原本由福建籍商人郭雙鰲開辦,之後賣咗畀香港地產發展商李世華,改名做「大世界遊樂場」,後來拆卸咗,變為住宅區喇!

Kelly Chu

hd