Executive日記——海洋公園鬼屋玩城寨驚魂 迪士尼彩繪站扮「詭」臉

        啱啱過完中國鬼節,好快又到萬聖節喇!又係迪士尼樂園同海洋公園「搞鬼」嚇人嘅時候啦,Kelly為人細膽,怕之餘又心思思去兩個樂園「擔驚受怕」,然後大笑一餐。今年迪士尼會有個彩繪站,大人細路都可以換個新形象,發揮惡人本色!海洋公園就有包含本土元素嘅鬼屋啊!

        迪士尼由本月十四號開始推出Halloween Time,到時會有個彩繪站,大人同小朋友都可以畫個詭趣大花臉,換個新形象,發揮惡人本色!《怪誕城之夜》嘅阿積又喺迪士尼嘅facebook專頁率先現身,聯同莎莉、Oogie Boogie,提醒大家要預先準備好套萬聖節造型,到時同埋海女巫烏蘇拉、黑巫婆、邪惡皇后等惡人,一齊去反轉迪士尼啊!

  海洋公園就設計咗啲有本土特色嘅鬼屋,包括重現九龍城寨面貌嘅「城寨驚魂」,同埋「殭屍森塚」。「殭屍森塚」唔係特登搭建出嚟,反而好巧妙咁利用園內一個原有嘅景點「怡庭」改建而成。怡庭係一個充滿日本風情嘅花園,設計師特別設計咗一條「九曲橋」,令到佢變成充滿中式氣氛。佢哋又特登只喺某啲部份興建上蓋,令到大家可以同時穿梭室內室外,同其他鬼屋嘅體驗好唔同,分分鐘會Feel到陰風陣陣㗎!

Kelly Chu


hd