Executive日記——任志剛晒珍藏「紅衫魚」

        一般香港鈔票嘅編碼只得六位數字,但行會成員、金管局前總裁任志剛昨日喺網上展示兩張特別嘅「紅衫魚」,其中一張個編碼係「XH1000000」,係七個位數字!任總解畫,呢兩張罕有鈔票,係親戚用面值賣畀佢嘅。Kelly問過專家,話七位數嘅鈔票係生產一批鈔票中嘅最後一張,甚有收藏價值,估計呢兩張鈔票值過萬元,任總認真識投資!

        任志剛喺網誌話,佢有收藏特別鈔票嘅習慣,展示兩張香港上海灘滙豐銀行嘅一百蚊,一張編碼係「XH999999」,係六位數,另一張係「XH1000000」,係罕有嘅七位數,而且兩張係相連號碼。佢話,兩張鈔票係喺一九八三年九月港元危機時,一個親戚用面值轉讓畀佢嘅。

  小妹好奇點解會有七位數字鈔票,就請教吓金輝錢幣郵票公司負責人陳榮輝,佢話每批鈔票產量係一百萬張,例如由「AA000000」印到「AA1000000」,「零號」係樣版鈔,無法定效力,「一百萬號」就係合法嘅。

  佢透露,以前嘅印刷技術無咁好,每次當印完「999999」之後,要用人手幫一幫部機器印第「一百萬號」,所以通常呢張鈔票最後嗰個「0」字,都會同之前嗰啲有啲唔同,可能高或低少少咁,小妹見到任總嗰張,都有類似情況!

  陳榮輝仲話,錢幣收藏家一般會稱「一號」係「開門號」,「一百萬號」係「關門號」,佢哋特別受歡迎。每一百萬張入面先會有一張咁特別嘅七位數字鈔票,任總當時用二百蚊就買到呢兩張鈔票,o依家升值到過萬蚊,真係識投資喇!

Kelly Chu

hd