Executive日記——達人估計貨量極少 十周年版iPhone隨時炒貴一半

        一年一度嘅新iPhone就快同大家見面,蘋果公司將於香港時間下星期三凌晨舉行發佈會,全球數以百萬計「果迷」同「果農」十分期待,好想知道即將推出嘅iPhone 8外形點樣有型法,同有咩新功能。有手機達人話畀Kelly知,近日各地物流倉至今仲未收到新iPhone收貨嘅消息,估計新iPhone發貨量可能比較少,預料中國未必係首發地區,咁就有可能會喺香港掀起炒風喎!

        Kelly本身都係蘋果用家,每逢有iPhone面世,都會深入研究一番,以決定是否換新機啦。聽聞iPhone 8會有新顏色「腮紅金」(Blush Gold),屏幕係五點八吋,手機背面有縱向雙鏡頭設計,正面鏡頭就有3D感應功能,而身份辨識功能方面,仲會將Touch ID指紋辨識功能直接放入屏幕,同時會採用臉部辨識科技。

  小妹有位喺旺角先達廣場開手機店嘅朋友話,以往新iPhone發佈會舉行前,已經收到各地物流倉接貨嘅消息,但今年就仲未有消息,估計iPhone 8嘅發貨量會較少喎,而香港一直都係新iPhone嘅首發地區之一,如果貨量唔夠,佢預計中國好大機會唔會係首發地區之列入面,如果真係咁的話,由於內地需求比香港大,新機喺香港一定有價有市,仲好可能會掀起炒風咁話,相信到時最開心莫過於一班「果農」啦,Kelly拭目以待。

Kelly Chu

hd