Executive日記——港設VR體驗館 內地設競技場 鄭志剛推K11踩入電競界

        一向追求匠人精神、緊貼至in潮流嘅K11創始人鄭志剛,宣佈進軍電競界,佢旗下嘅K11將會同內地第二大移動電競研運商「英雄互娛」合作,耗資過億元喺全國至少九個城市打造電競潮流地帶,香港K11會建立VR體驗館、電子競技主題嘅酒吧餐飲娛樂互動區,而內地就會開設電子競技館,引領電競文化啊!

        K11創始人鄭志剛昨天好開心咁話,電競係新一代年輕人都熱衷參與嘅文化產業,佢希望K11今次可以創建線下最大二次元電競體驗空間,同埋將呢樣體育競技同藝術相結合,帶畀大眾一個獨特嘅未來創意科技生態圈!

  K11昨日宣佈,同亞洲移動電競一線研運商「英雄互娛」喺上海簽訂為期十年嘅獨家策略合作協議,嚟緊佢哋就會喺全國九個城市嘅K11開展電競項目,包括香港、上海、北京、廣州同深圳等地,香港K11會有快閃式嘅電競同VR體驗活動、電子競技主題嘅酒吧餐飲娛樂互動區,同埋會舉辦大型電競賽,又會實況轉播內地一啲聯賽,仲會安排英雄互娛嘅頂尖選手同教練嚟香港交流,希望喺香港培育電競人才,力爭參加二○二二年亞運電競賽資格!

  佢哋又會喺內地七個城市建電子競技館,全面推動各種電競賽事,同埋安排下年嘅「英雄互娛HPL英雄聯賽」年度總決賽,喺K11最大規模嘅瀋陽項目「新世界國際會展中心」舉辦,等更多遊戲玩家、電競選手同普通大眾都可以參與啊!

  同K11簽訂合作協議嘅「英雄互娛」,Kelly八卦到,呢間公司喺內地好有名,佢係中國第一家基於互聯網體育上市嘅企業,又發起亞洲最大嘅移動電競賽事HPL英雄聯賽,仲位列中國移動電競研運商第二名㗎!

Kelly Chu

hd