Executive日記——鑽石王老五封盤 楊岳橋靜靜雞「做老襯」

  立法會公民黨議員楊岳橋(AY)去年底同拍拖多年嘅女友求婚,令到唔少粉絲心碎,呢排佢話離港去旅行,點知原來係靜靜雞同女友正式拉埋天窗,宣佈封盤!立法會又少一個鑽石王老五,不過Kelly真係恭喜楊岳橋呀!

  話說楊岳橋今年年頭宣佈向事務律師女友Eve Chan求婚成功時,一直無講實幾時結婚,點知佢近日去歐洲旅行之際,佢個facebook「810扮工室」公佈喜訊,原來兩人已經秘密註冊,事前並無走漏風聲。聽聞佢哋年底會喺香港辦雞尾酒會,又會喺意大利拍攝結婚相。好多網民都好奇到底AY幾時造人,不過佢同愛妻都各有各忙,似乎網民都要等下啦。

  講開又講,去年九月立法會選舉時,AY同陳玉娥拍得一張「娥頸橋之戀」照片,喺網上被瘋傳,唔知娥姐會唔會祝福一對新人呢!

Kelly Chu

hd