Executive日記——扮鬼扮馬助學童 輕鬆做善事跑吧老夫子!

  數到最代表到香港嘅卡通人物,Kelly即刻諗起老夫子!連慈善活動都忍唔住搵佢嚟幫吓手。小妹八到,博愛醫院十一月將會喺天水圍舉辦老夫子主題嘅慈善跑步活動,鼓勵參加者打扮成老夫子或者着上懷舊衣服,所有參加者仲可獲限量版《老夫子》紀念袋及跑手禮品包O添!玩得開心又做到善事,好有意義啊!

  今次活動設有六千個參加名額,分為十公里同三公里賽事,畀大家自由組隊或者一個人參加「企業團體組」同「個人組」參賽,沿路仲會有樂隊為跑手打氣,展現守望相助精神!

  老夫子老少皆宜,當然歡迎親子參加喇!活動仲特設唔計時嘅一公里組別,鼓勵大家懷住輕鬆心情投入整個跑步過程,仲有埋懷舊服飾比賽同香港情懷嘉年華等,非常多元化㗎!一想像到時有成千上萬個老夫子、大蕃薯一齊跑步,Kelly就感受到個種熱烈氣氛,好期待喇!

  唔止咁,今次籌得嘅善款仲會全數撥捐至「博愛青少年發展助學金」,幫助有家庭經濟壓力嘅學童達成學習計劃同夢想,認真好玩又有意義,睇嚟小妹到時都要約齊成班好姊妹,扮鬼扮馬參加活動先得!

Kelly Chu

hd