Executive日記——冰室文化展 尋找好味道

  舊式冰室係唔少香港人嘅集體回憶,O依家剩番唔多,俾茶餐廳取代咗。想重溫上世紀六十年代冰室嘅味道,太子一個商場就舉行一個以冰室為主題嘅展覽,有當年喺冰室使用嘅餐具等二百件展品,有啲連Kelly都係第一次見!

  太子始創中心以冰室為展覽主題,請來幾年前因收樓而結業嘅中環老冰室海運茶冰廳嘅負責人、收藏家歐陽偉航,借出佢舊店多件珍藏,包括唔同年代用過嘅餐具、擺設、手繪掛畫等,將成個商場變成傳統冰室,充滿昔日情懷,好正啊!

  展覽仲展出社交專頁「奶茶通俗學」崔氏兄弟嘅插圖同漫畫,同解構冰室經典食物同術語!夠晒多元化,展覽即日起到十月八日喺商場舉行。

Kelly Chu

hd