Executive日記——香港單車節十月舉行 當黃金寶遇上隱世高手

        「香港單車節」係體壇盛事,將於十月舉行,Kelly鍾意踩單車,但仍須努力,先可以上賽道同人比併﹗但「隱世單車高手」何其多,旅發局最新嘅「香港單車節」宣傳短片,搵嚟亞洲車神黃金寶粉墨登場,仲有一個陌生面孔雄哥,佢可稱為「重量級單車手」,因為佢嘅工作係踩單車送石油氣,雄哥仲教阿寶踩佢嗰部有五十年歷史嘅送氣單車,令阿寶大開眼界!

        前世界單車冠軍黃金寶今年擔任「新鴻基地產香港單車節」嘅大使,佢喺旅發局安排之下,結識咗一位「隱世單車高手」,大家惺惺相惜。呢位嚟自深水埗嘅單車高手雄哥,今年六十五歲,佢日日踩住部單車喺馬路穿梭,就咁向客戶送石油氣送咗三十年!稱得上係「重量級」嘅單車高手,佢架單車本身重七十幾公斤,再加埋最多七桶石油氣上去,總重有成二百幾三百公斤,要揸得好,少啲技術都唔得㗎!  相反阿寶平時踩開用賽事車專用嘅炭纖維單車,只重九公斤,佢試踩雄哥部「重量級」單車,都要花啲時間先掌控到,難怪連見慣大場面嘅阿寶都笑言:「香港車壇臥虎藏龍!」

  雄哥對阿寶話, 踩單車送石油氣,係好孤獨嘅生活。會參加香港單車節三十公里項目嘅阿寶,就即刻邀請雄哥喺十月八號一齊參加單車節,雄哥話好喎!

Kelly Chu

hd