Executive日記——無線化妝大師生前傑作多 輝哥首創「牙籤畫眉法」

  人稱「化妝大師」嘅無線前首席化妝師陳文輝,前晚因肺癌病逝,佢從事化妝工作六十年,不少明星喺電視、電影上嘅靚妝都出自佢手,連荷里活巨星史泰龍和尚格雲頓都點名搵佢化妝,認真巴閉。Kelly從「輝哥」嘅徒弟徒孫口中得知,佢發明不少化妝「秘技」,好似「牙籤畫眉法」和「手側推胭脂法」,喺早年物資匱乏嘅年代,以心思創出靚裝技巧。

  星級化妝師鍾日華(Gary)對Kelly講,十幾年前初入行,「輝哥」係大師級人馬,但好樂意指點後輩。Gary透露,當年化妝工具唔似現在咁先進同多樣化,「輝哥」自創「秘技」,教後輩用牙籤挑畫一條條眉毛,睇落唔會好實色同好假,效果媲美現在嘅好幼細嘅眉筆,自然而美,認真厲害。「輝哥」仲教過佢,用手指尾對下嘅手枕位喺女士臉上推開胭脂膏,得出自然透紅嘅感覺,同近排流行嘅梨形粉撲有異曲同工之妙。

  另一位有名形象設計師張學潤(Nel Nel)同小妹透露,聽過唔少女藝人讚「輝哥」化嘅妝底特別貼服順滑,睇落好自然又唔會好粉,佢識得按每個人嘅臉部輪廓修容,望落與別不同。家燕姐就同小妹講,「輝哥」化大戲妝都好得,佢會搵靚化妝品返嚟,務求幫明星化到最靚,真係化妝教嘅教父級人馬。

Kelly Chu


hd