Executive日記——抄日本綜藝節目大嗌 香港警察賀fb破12萬like

  不少網民都識玩二次創作惡搞一啲出名片段,估唔到連香港警察都識得玩埋一份!Kelly近日就發現有條網片熱傳,見到有個男仔喺天台大嗌,宣佈警隊facebook已經突破十二萬個like,剪輯風格激似早年某個日本天台告白節目,果然好跟得上潮流喎!

  片段一開始,一個自稱係「警隊facebook升級報道員阿安」嘅男仔,企咗上天台好興奮咁大嗌:「好想話畀你知,警隊facebook已經有十二萬四千人Like咗喇!」咁啱前日就係香港警察facebook專頁成立兩周年,所以佢仲大叫多句:「好想講聲生日快樂啊!」夠晒中氣不特止,條片當中仲加咗唔少有趣特效,連台下拍手嘅畫面都有埋,抄足早年日本一個綜藝節目,好搞笑呀!

  不過笑還笑,內容都好認真㗎!阿安仲話,呢兩年嚟請過唔少名人喺呢個平台出現過,做咁多嘢,都只係想同大家分享準確消息,等大家多啲認識警隊同傳播防止罪案訊息,仲好激動咁話:「等你哋唔好再俾人呃呀!」最後仲希望大家畀多幾個like佢哋O添!呢個宣傳方法,一眾網民都好受落,係咁留言大讚「好好笑」、「正啊!」仲叫警隊加油O添!咁辛苦二次創作,Kelly都覺得好抵讚啊!

Kelly Chu

hd