Executive日記——尋寶探趣藝術展 小小藝術家 「童」心砌出深水埗

  深水埗喺唔少人心目中係「平、靚、正」標誌,Kelly都成日喺嗰度尋寶!有藝術家就聯同香港青年藝術協會將尋寶加創意,搞咗個「深水埗尋寶探趣」藝術展計劃,畀一班住喺當區嘅小朋友自己發掘材料,再砌成佢哋眼中嘅深水埗,仲會展出O添!睇見件件作品都童心爆棚,Kelly好鍾意啊!

  藝術家岑嘉慧(Violet)早前喺暑假期間,聯同青年藝術協會同一班義工,帶住十八個六至十二歲嘅小朋友齊齊去深水埗嘅鴨寮街、汝州街同有「玩具街」之稱嘅福榮街等地方尋寶,將一啲睇落同藝術大纜都扯唔埋嘅物品,好似五金零件、珠仔、小積木等等買晒返去,再由佢哋創作出一件件馬賽克立體拼貼藝術,畀小朋友表達自己同社區之間嘅故事,非常有意思!

  其中一個參加者黃希琳同Kelly分享佢嘅作品,話佢砌咗個即影即有相機,因為覺得菲林可以記錄低好多唔同嘅回憶咁話,所以作品就被命名為「風景與回憶」!同場仲有唔少貓、雪糕、棚仔等作品,全部都屬於呢班小朋友同深水埗之間嘅特別回憶。藝術展即日起至十五日,會喺香港喜來登酒店展出,大家記住約埋成班朋友,一齊欣賞吓呢班小朋友嘅童心喇!

Kelly Chu

hd