Executive日記——演藝學生貼街招 借唐樓屋拍微電影

  街招,無奇不有。Kelly日前喺太子行街,見到一張好得意嘅手寫街招(見圖),想借間屋拍戲,仲希望有沙發同廁所配合。小妹八卦,按街招上嘅電話問吓,搵到監製阿虎,佢原來係演藝學院嘅學生,同五位同學仔正拍攝一部微電影《少年阿當》,作為畢業作品,內容講述一個十七歲少年,同單親爸爸相依為命,爸爸一直話媽媽早逝,但佢遇到一個跟媽媽好相似嘅女人,對方卻不肯相認,表達一個少年成長嘅憂鬱故事。

  阿虎話,有幾個有心人接觸佢,但有間唐樓唔啱feel,仲要另覓理想地點,套微電影喺十二月開拍,佢有啲心急,仲話有屋主幫手,願意薄酬咁話,咁小妹呼籲大家幫吓後生仔發揮創意啦。

Kelly Chu

hd