Executive日記——索價一千人仔 Rex「神奇拳套」 網上竟然有售﹖

「神奇小子」曹星如(Rex)打低日本勁敵河野公平,Kelly開心歡呼,Rex人氣更盛,一舉一動,備受注目,好似佢當晚戴嘅拳套,喺勝出後佢好興奮,掟咗落觀眾席,有勞隨員飛身回收,原來係要預留俾贊助商送出去㗎!相信不少人都想擁有Rex嘅「神奇拳套」,咁就要諗計,Kelly發現有人喺淘寶網聲稱有曹星如親簽名嘅拳套放售,索價一千元人民幣,連Rex嘅發言人都話唔知真假,不排除以前送出嘅限量版,被人再放售喎。

獨家直播曹星如對河野公平賽事嘅香港寬頻,打算趁阿Rex打完,將佢手上對拳套封箱,俾公眾抽獎,但當晚Rex贏咗對手後,開心到掟咗拳套落台,嚇到隨員即刻衝落台,向兩個觀眾取回!隨員都好識做,承諾送番個iPhone 8 Plus同一對Rex簽名訓練拳套畀兩人,大家happy!

  Rex拳套,人人想要,咁Kelly周圍搵吓,真係搵到喎,居然喺淘寶網見有人放售一對,標價成一千元人民幣!賣家同小妹強調,拳套係透過公司同Rex合作,有親筆簽名,但就對戴過嘅場次同其他詳情唔多清楚喎!

  Rex拳館嘅發言人就話,佢哋不時同贊助商合作,推出簽名拳套作為抽獎宣傳之用,數量唔多,可謂限量推出。佢聽到淘寶網上出現「親筆簽名拳套」,都話好搞笑,仲問Kelly拎連結睇清楚!對於真偽,佢話唔敢肯定喎。Kelly分析過,簽名幾似曹星如字跡,係咪堅嘅,就要再研究吓先!

Kelly Chu

hd