Executive日記——木乃伊展覽 超過76萬人參觀

  木乃伊,好神秘呀。唔少人都想窺探真相!難怪香港科學館舉辦嘅「永生傳說─透視古埃及文明」展覽,叫好又叫座,截至今個月二號已經有超過七十六萬人次參觀過喇!Kelly見到館長陳淑文接受新聞處訪問,佢透露同一班專業人員嘅事前準備策展工作,一啲都唔容易!

  科學館早前向大英博物館借咗六具木乃伊同相關文物來港展出四個月,機會難得!好似該館機械工程科技主任陳劍峰就喺專訪入面笑住咁話,最初擔心場館成立二十幾年,冷氣系統未必達到配合展品溫度嘅要求,但為咗陳館長一句「搞掂佢!」,硬住頭皮做好,形容簡直好似將一架老爺車改裝成一級方程式賽車咁喎,勁啊!除此之外,展覽精心設計咗好多互動設施、多媒體項目等等,只為大家睇得開開心心!咁有心思,各位記住把握最後機會,今個月十八日前入場睇多幾次喇!

Kelly Chu

hd