Executive日記——野餐先鋪「大枱布」 高質員工好抵讚

        秋高氣爽,又係行山野餐嘅好時光。昨天有行山人士喺香港仔郊野公園見到好特別嘅景象,園內一個燒烤場嘅好多張石屎枱櫈畀人用膠袋包起晒,唔講仲以為係有人玩行為藝術,望真啲,原來係招商局集團搞公司日,成班員工叫到會開野餐Party,有女員工話,活動完結後都會執拾乾淨,冇遺下垃圾,仲話會將膠枱布拎返去循環再用,咁有環保意識,仲保護郊野環境,真係抵讚!

有行山人士同Kelly講,昨日下晝行過香港仔郊野公園時,見到燒烤場好多石屎枱櫈被「包膠」嘅奇景,真係第一次見。Kelly去現場睇過,原來係招商局集團舉辦一年一度嘅公司日,於下午兩點左右去園內嘅傷健樂園燒烤區開Party,有女職員話共有二百多人出席,場面好熱鬧,公司安排豐富食物到會,大批身穿藍衣員工齊齊開餐,好happy。

  參與活動人數眾多,所以公司職員好有心,用大膠枱布鋪喺燒烤場嘅枱櫈,保持整潔。有女職員話,食完就會執走所有食物同垃圾,Kelly下晝四點亦幾見到職員帶埋黑色大垃圾膠袋,開始清理場地。另一女員工仲話,會攞膠枱布返公司飯堂重用,Kelly真係估佢唔到會咁環保,值得其他燒烤人士效法!

Kelly Chu

hd