Executive日記——配埋靚酒 快啲搶飛啦 美酒佳餚節飽嚐星級大廚美食

        有品味一族等到頸都長嘅「建行(亞洲)香港美酒佳餚節」,呢個月二十六起一連四日喺中環海濱舉行啦。秋意漸濃,屆時飲杯靚酒,享用美食,係人生樂事。Kelly有搵食嘅好貼士提供,今年旅發局特設「星級大廚美食試味」,一次過畀大家飽嚐洲際酒店四間高級餐廳星級大廚嘅手藝,小妹試過,法國精緻美食、扒房經典菜、日本料理同粵菜精品應有盡有,大家快啲行動,以免向隅。

        小妹昨天去洲際酒店睇吓Rech、The Steak House、Nobu同欣圖軒多名星級大廚準備呢次名為「A Taste of Culinary Stars」嘅菜式,款款有心思,賣相媲美藝術品,味道各有特色。法式嘅凍藍龍蝦、魚子醬配檸檬果凍同酥炸生蠔串,係海洋鮮味嘅代表作。由一九八二年配方秘製嘅新奧爾良煎蟹餅,經典滋味,百吃不厭。當造油甘魚刺身好肥美,配南美辣椒,估唔到撞出新意。至於欣圖軒嘅金腿瑤柱蘿蔔絲酥,千層香鬆酥皮,最得我心。

  Kelly有兩個貼士,第一係「星級大廚美食試味」每位收五百八十元,仲配埋酒,非常超值,要盡快行動搶門票。

  另外,今次大家可以在場內輕鬆品酒,因為大會奉警方嘅安全建議,參展酒商不會在場內派玻璃酒杯,改用有型嘅細膠酒杯,揸喺手好方便,分多幾次試多啲美酒都無問題,小妹仲諗住用完帶番屋企留念O添。

Kelly Chu

hd