Executive日記——配合唔同場合 打扮得體 林鄭講《施政》 一日三套衫

  林鄭昨天發表《施政報告》處女作,成為傳媒焦點。Kelly見佢應付議員同記者,忙到一頭煙,但依然悉心打扮,換咗三套衫,喺唔同場合介紹施政理念,絕不馬虎,形象顧問都大讚林太打扮典雅得體!

  林太昨早出席立法會宣讀《施政報告》,身穿一條淺金色山茶花圖樣旗袍,外襯一件白色西裝外套,再加配一對米白色嘅鞋。下午去記者會,外套無轉,裏面就換上一條藍底白花嘅旗袍,同埋一對黑色鞋。林太曾經講過,長衫唔使多,識得配搭就足夠,今次她再次施展配搭魔法,襯出唔同風格!小妹覺得,她下午嗰身藍白色造型,仲好襯今年《施政報告》嘅粉藍色調㖭!

  到咗夜晚,林太換上全新一套旗袍同外套,今次以紫色做主色,仲戴上一條珍珠頸鏈,十分搶眼﹗形象顧問張學潤話,林太呢套衫好靚,望落去好高貴,大讚用料有質感,好有層次感!佢覺得另外兩套裝扮典雅得體,係林太一貫風格。

  小妹昨日又聽到,林太引用回歸二十周年嘅主題曲《香港‧我家》一段歌詞勉勵港人,「用努力建起舉世奇葩,更相信自我有身價」,她相信「香港固有優勢並沒有消失,香港人依然優秀,香港精神亦無減退」,仲話自己嘅願景係令所有生活喺香港嘅人都抱有希望、感到幸福。小妹都希望可以實現喇!

Kelly Chu

hd