Executive日記——立會議事堂鬥一番 林鄭拒收300蚊 KO郭家麒

        林鄭前天由早到晚十幾個鐘講佢首份《施政報告》處女作,昨天又馬不停蹄接受議員同傳媒嘅提問,連續兩日十幾粒鐘無乜得休息,但Kelly見到佢容光煥發,好似昨日出席立法會答問大會,遇到郭家麒議員挑機,話畀番交通費補貼三百蚊佢,林鄭反應神速,即刻回一句「你有行賄之嫌」,立刻KO郭醫生,好睇過曹星如打贏河野公平。

        喺答問會上,公民黨郭家麒批評林太用交通津貼小恩小惠收買民心,更離開座位,行去主席台,想將三百蚊交通津貼畀番林太咁話喎。林太就好精靈,笑笑話:「你有行賄之嫌」。由於特首將受《防止賄賂條例》規管,林太出招,就KO咗郭生,佢無駁咀,行返埋位。

  答問會上有唔少笑料,有議員幾次叫錯林太嘅稱謂。工黨張超雄提問時,先誤稱林太做「局長」,即刻修正為「特首先生」,隔咗幾秒後,佢再稱林太做「特首夫人」,議員同公眾忍唔住笑晒﹗工聯會郭偉強亦稱呼林太做「林特首」,畀其他議員提醒,應該稱呼做「鄭特首」。

  小妹見到,林太昨天變身,冇好似前日一天換三件旗袍,而係着上一條藍色連身裙襯黑色西裝褸,不過就保留前晚嗰條珍珠頸鏈,睇落好有貴氣﹗小妹見到林太喺facebook上載一段短片,佢話自己前日連續工作十四個鐘,覺得好攰,但小妹見到佢個樣仲好精神,對眼仲好似識放電咁,電力十足!

  另外,林太丈夫林兆波前日都有陪同林太去立法會發表講話,做特首背後嘅男人,好溫馨!

Kelly Chu

hd