Executive日記——品嚐14國家威士忌 出奇歡樂皇東有得玩有得飲

        灣仔區新舊交融,好有特色,Kelly好鍾意去周圍探索﹗灣仔合和中心露天廣場同利東街下月兩個周末將舉行一個「出奇歡樂皇東節」,設品酒之旅,讓大家歎六十款絕版、珍藏級同得獎級嘅威士忌,仲有嘉年華,一於盡情狂歡!

        合和實業有限公司主辦嘅「出奇歡樂皇東節」,今年去到第七屆,仲係旅發局「香港盛宴11月」推介活動之一。重頭節目係十一月十八同十九號嘅「皇東品酒之旅」,大家憑門票可以喺灣仔The East同利東街約二十個品酒熱點,盡情品嚐嚟自超過十四個國家嘅威士忌,當中包括六十款絕版、珍藏級同得獎級威士忌﹗品酒之旅又設有世界級花式調酒表演,仲有酒杯書法工作坊、調酒工作坊同威士忌講座,同埋由圓點工房Canapés Room主理嘅法式精緻美食攤位﹗

  而十一月二十五同二十六號會有免費嘅「皇東節嘉年華」,節目包羅萬有,包括音樂同舞蹈表演,例如有1563 at The East 音樂表演、Hong Kong Funky Dance、佛蘭明高(Flamenco)舞蹈,仲有花式跳繩表演同奇幻水晶球雜技表演等啊﹗

  皇東節昨日公佈活動詳情,仲喺現場有花式調酒表演,小妹見到「少年酒神」葉瀚華都有出席,同場仲有合和資產管理有限公司董事梁庇世、《威士忌雜誌》香港及澳門國際中文版董事黃國隆等人,場面好熱鬧﹗

Kelly Chu

hd