Executive日記——梅拉尼婭簡約得體 彭麗媛衣着優雅顯東方美

  美國總統特朗普伉儷首次訪華,成為國際大新聞,Kelly見到國家主席習近平偕同夫人彭麗媛迎接,國母嘅裝束令人眼前一亮!難怪連兩個著名設計師都大讚佢衣着優雅又有東方美,話畀佢八十分以上!

  特朗普帶同太太梅拉尼婭訪京,一落機就獲習近平邀請去故宮參觀!特朗普伉儷穿黑色大褸,而習氏夫婦就穿灰色大褸,相映成趣,彭麗媛件大褸最特別,有一條大領巾嘅裝飾!

  著名時裝設計師鄧達智(William)讚四人都好有心機裝扮!好似梅拉尼婭,成身黑,但設計簡約,剪裁貼身,顯出美好身段又得體,值七十分喎!國母彭麗媛更搶鏡!William 形容習夫人大褸好有特色,略勝一籌,且入面件旗袍有啲偏銀白色嘅圖案,同佢耳上嘅珍珠耳環相襯,簡約得嚟又突出,畀佢八十分!

  另一個名設計師陳刀對習夫人嘅打扮有讚無彈,話外套低調得嚟又fashion,加上少少露出嚟嘅旗袍,盡顯東方美,將身上嘅女人味散發得淋漓盡致,畀佢八十八分咁高分。

Kelly Chu


hd