Executive日記——熱愛中國文化 伊萬卡仔女生日 食長壽麵慶祝

  美國總統特朗普訪華,特登向國家主席習近平展示六歲外孫女阿拉貝拉(Arabella)唱中文歌同唸《三字經》嘅短片,Kelly見到佢個小孫女嘅中文又進步咗!原來佢媽媽、特朗普女兒伊萬卡熱愛中國文化,畀三個小朋友自細學中文,仲請中國人做保母,又喺仔女生日時同佢哋食「長壽麵」,仿效中國人嘅傳統。

  中國人生日會食長壽麵慶祝,小妹喺伊萬卡嘅Instagram見到,每逢佢三個仔女生日,佢都煮意大利麵,好似女兒阿拉貝拉六歲生日,兩母女好Sweet咁食麵,伊萬卡仲留言話:「Birthday tradition— noodles for a long life」,希望食完麵條會更長壽,睇嚟係以意粉代表長壽麵,仿效中國人習俗!

  伊萬卡好重視中文,屋企保母係中國人,佢為仔女報讀中文學習班,阿拉貝拉由一歲半就學中文,最細嘅仔仔西奧多喺一歲就上堂啦!喺伊萬卡悉心栽培下,阿拉貝拉識得好多中國詩詞同歌曲,今年農曆新年時,佢手拎一個舞獅玩偶,一邊用中文唱兒歌《新年好》。

  今年四月習近平訪美時,阿拉貝拉同埋弟弟約瑟獻唱中國民歌《茉莉花》。Kelly仲見到伊萬卡喺網上發相,佢同細仔玩西奧多玩積木,上面寫滿「馬」、「頭」、「人」、「十六」、「三十一」等漢字,睇嚟伊萬卡真係好熱愛中國呢!

Kelly Chu

hd