Executive日記——精采音樂會 一票難求 柏林愛樂樂團直播免費睇

  為咗慶祝香港回歸二十周年,世界頂尖樂團之一嘅柏林愛樂樂團,今晚八點同明午五時係尖沙咀文化中心音樂廳,呈獻兩場精采嘅音樂會﹗Kelly知道,公眾反應熱烈,一票難求,康文署好貼心,特別喺三個地方設立大熒幕,直播音樂會,實行與眾同樂,真係抵讚!

  柏林愛樂樂團自一八八二年創立以來,一直被公認為當今最傑出嘅管弦樂團之一。喺現任樂團總指揮兼藝術總監西蒙.歷圖爵士帶領下,樂團喺新時代都保持朝氣同活力。樂團致力編排富創見同新穎嘅曲目,一直深受樂迷歡迎!小妹知道,歷圖爵士計劃喺下年卸任,今次可以喺香港睇到佢嘅演出,機會千載難逢﹗

  今次柏林愛樂樂團將喺兩場音樂會中,帶嚟理察.史特勞斯、布拉姆斯、史達拉汶斯基與拉赫曼尼諾夫嘅大型管弦樂作品。鋼琴家趙成珍將為今晚拉威爾的《G大調鋼琴協奏曲》擔任獨奏,而明午樂團將演奏著名韓裔作曲家陳銀淑為樂團而創作嘅作品。

  小妹知道,樂迷對兩場音樂會反應好熱烈,只剩餘少量門票,而康文署知道唔少朋友未必買到門票,所以特別喺三個地方現場轉播音樂會盛況,包括香港文化中心露天廣場、沙田公園結客場、元朗劇院演藝廳,費用全免,咁大家都可以露天欣賞美樂,過一個愉快嘅周末。

Kelly Chu

hd